Alay santing mon bulan
letaw letaw ka’d tapew
na sarayan bulo-bulong ya binalkot
na andekereket ya bilunget
leleg ya manag-agos
so agko nanengneng ya danum
ed dalem na sayan
manbokbokor ya taytay.
Agmo ak pa tataynan
(panangasim)
ed sayan panaakar-akar kod
labin alipos na paga.
Ta say ot-ot
et mamepereng ed siak,
mamapaolya’d sali-salik
ya napelag ed sayan kolos.
Eletan moy gemes mod limak,
iturom so dalan,
tan angga’d isabik ed abung
agmo ak tataynan.
Ta santing mo lambengat lay
mogmon bilay ko tan pikakasik
ya napalabas ko ‘yan labin inulesay
managaag mon liwawa.