Sakey ya kabuwasan leleg kon manpapaabig nen adepress ak, nanakar kami nen Papa manlapud abung mi ed Santa Maria angga’d baley na San Jacinto. Kabuwasan iman. Nayarin kayarin tuloy na almusal mi.
Akasapatos kamin duwa. Malamang akasumbrero si amak leleg min aakaren so National Highway antis kamin tinmubong ed dalan mamaarap ed San Roque. Kasabi mi’d crosing, nayarin imbano mi’d satan so agi nen Kuya Julius, si Jocris. Intultuloy mi nanakar ed dalan. Anggapo masyadoy kabat nen Papa ed petek na eskwelaan na Sta. Maria katon diretso kami labat ed satan diya’d San Roque.
Aliknak ed saman ya akar mi nen amak ya sikato et sinsero. Gabay ton talagan onabig ak tan anengneng ton talagay irap ya dinalan ko. Gabay ton makabawi ed nononoten ton kakulangan to ya nagmaliw ya rason no akin agawa’d siak so agawa. Nayarin walay pantotongtongan min nagagawa’d mundo o diya’d bansa katon binitla ton “antam met no akin nagagawa ira ya.” Balet singa ed sayan panaon amo et kinmapoy lay pananisiak ed Diyos tan relihiyon to.
Nayarin akasabi kami’d baley ta nanonotan kon walay pankanawnawan anengneng koy Papan katongtong to iray suki to ed tindaan. Padisir ko ayan tiyempo iman ta mantultuloy ya nagawa ya. Ampano ingen agla naulit. Anggaman no agko la nanonotan so balang sakey ya memorya na saman ya impan-akar mi, sakey iman ed agkon balot nalingwanan ya akar.