Mikakasi kalamor iray taloran nganak min
akisirom-sirom ed pandak ya ponkan
ya kinmekebet laray pigpigaran bulong to.
Akasangi sakey, manduldulok ed paet,
agla aka-anos tinuktok toy ponkan
balet ag pinmusitsit—amagamagaan.
Pinmaway ak tan sikaray inamparan
ta diyad loob na bungalo min ag abobidaan
kamo no lalong ak ya ititinolad kaagwan.
Agko ni lalangola naulit so anges ko
nen ginmapon binmaleg so tedter
na linget ya amalduay moling ko.
Nandiskanson agano’d sampot na eleng kon
delpak insan intuloy ton inmagos
ed sungot, baba, tan tenger ko.
Angitagar na arum leleg ton ininot ya pinetek
so pagew ko tan binmaleg lan binmaleg
angga’d asabi toy musing kon pinakigtel to.
Akiki ak. Akagiwgiwgiw ak.
Akataboy-taboy si tedter ya pinmata’d
pegley na manpapanabos ya mano-manok.
Tinmundan amin.
Kinunineng na sanaagi so tibukel ya kristal
ya mansiyayap ed mata-mata ran manatalaran.
Kabebekta,
ingalan, tuktukan!
Nansisinggawan day tedter na linget
ya mogmon ilalo da antis mi ‘ran
ipa-ugtod onsabi mi ‘ran bisita.