Unonan Kapitulo
Siak so unaan a akanëngnëng ëd kalkalnan insabi to ëd ataragëy a dika na amagan datal na ilog. Matinonos a nanaakar tan nën asabi to’y onsasalompapak a kiëw na mangga ya angibiig ëd dalin mi manlapud dalin na laki mi, inyaplag to’y bëdbër to’d dalin tan yinurungan to, lëlëg ton akanëngnëng ëd abung mi tëkëp so kapagaa’y toon abayag a akaarawi’d ayaman to. Sikato ët ngalngali ag ni nabirbir ëd masakbay a silëw na kabuasan, balët agniburi’d kakaakar to a binaroy toy andukëy a lëëtan. Ompatnag a sikato’t aliwan sankaili’d baryo mi, lapud singa amta to no inër so laën to tan ag manaapura.